حكمــة اليوم

ثِق بِأَن الْصَّوْت الَهـادِئ أَقْوَى مِن الْصُّرَاخ؛وَأَن الْتَهـذِيْب يَهـزَم الْوَقـآَحّة ., وَأَن التَّوَاضُع يُحَطِّم الْغُرُوْر.

السبت، 28 أبريل 2012

قريتي الجميلة الهادئة ماذا حدث لها !!!!!!

صورة طريفة لصالة بلياردو و ليس هي الصالة المقصودة

شفتوا صالة البلياردو اللي فتحوها عندنا في البلد!
قريتنا الجميلة التي يقطنها اكثر من 38 الف نسمة اخذت من المدنية اقبح ما فيها..بيوت خرسانية ناقصة تشطيب و اقرب للعشوائيات... صالات العاب الفيديو و سيبرات النت..قهاوي شعبية و كافيهات - محلات لبيع الهدايا دباديب و ميك اب و عطور - محلات سوبر ماركت لبيع المواد الغذائية المجمدة و المعلبة (راحت خلاص على خير الأرض)
و كل ده و مع ذلك ليس فيها: نادي رياضي محترم - حديقة عامة - مكتبة عامة - مستشفى محترم... احنا في العام الثاني عشر بعد الالفية الثانية و مازلنا نقطع مسافة 30 كيلو للذهاب للطبيب يعني لو واحد بيموت يبقى راحت عليه محدش هيلحقه..

و صالة البلياردو دي كمان حكاية...طب خلوها صالة جيم طيب!

الجمعة، 27 أبريل 2012

انت ديانتك ايه..لمؤاخذة!!

من عجائب الانترنت اني اكتشفت ان ناس تعتبر السؤال عن الديانة سؤال محرج! و لو سألته تلاقيه اتعصب و قلب الوش و يمكن يشتم و يقول "انت مال ديانة امك" شفت واحد على الفيسبوك بيقول كدا بالنص و واخد كم لايكات رهيب يعني ناس كتير موافقاه!!

مش عايزين نفتش في النوايا لكن السؤال فعلا غريب من عدة نواح:
اولا ما تسألش حد عن دينه الا اذا نويت الارتباط به لان الدين اكثر ما يترتب عليه مسئوليات اجتماعية كالنسب و الميراث و خلافه دا غير التأثر به و بفكره لو كان الارتباط هو ارتباط صداقة.

ثانيا انت ممكن تعرف حد مسرف على نفسه و يرتكب معاصي و هنا يبقى في قمة الحرج لو سئل عن دينه لانه بالفعل يخالف بعض تعاليمه فلا تستدرجه ليفضح نفسه و دع الامر بينه و بين ربه.

ثالثا اذا كنت في حوار مع شخص ما و اختلفت معه بحدة في النقاش ثم فجأة قررت تسأله عن دينه عشان ده يبقى مدخل للهجوم عليه من خلال ذلك فاحذر هنا انت على حافة الشخصنة و مناقشة الشخص دون الفكرة يعني مش تكون بتتناقش مع شخص و تلاقي بعض افكاره فيها انتقاد للمسلمين او للاسلام فتقول في بالك هو انت مسيحي؟ عشان تعطي الضوء الاخضر لنفسك للهجوم على المسيحية..المنطق ده يحتوي في مضمون فكرة انك مش قادر ترد فبتاخد منحى آخر للهجوم

و اخيرا بقى انا شايفة الانسان من حقه يعلن عن فكره الديني حتى لو كان ملحد بشرط ان ذلك لا ينطوي ذلك على هجوم على عقائد الآخرين و مش ملزم حتى تبرر لماذا اخترت عقيدة معينة انما لازم على الاقل تكون صريح مع اللي حواليك مش تكون ملحد طول عمرك و تيجي تتجوز على سنة الله و رسوله!

الفن و رسالة الفن..هأو

عن عادل امام و قضيته المثيرة للجدل اتحدث..و اكثر من يغيظني في حديث المدافعين عنه هو كلامهم عن رسالة الفن!

محدش يكملنا عن الفن و رسالة الفن قبل ما يقولنا هوايه الفن اساسا...الفن ابتدعه الانسان للترفيه كنوع من الرفاهية بعدما لبى احتياجاته الاساسية من طعام و شراب و مسكن..فعندك بلد فيها 40% من السكان تحت خط الفقر ارجوك لا تحدثني عن الفن لان الفقر ايضا اصاب عقول الذين يعملون فيه
ثانيا لما الانسان وصل لدرجة من الرفاهية و الرقي في الفكر و اكتشف ان تقديم المسائل الجادة في اطار ترفيهي يجعل لها قبول اكثر لدى الجماهير ساعتها ظهر معنى "رسالة الفن" ففي الفن الذي امامنا اليوم اين هي تلك القضية الجادة التي يعرضها الفن في رسالته المزعومة!!
عادل امام نفسه اشتهر عنه انه بيعتبر الافلام نوعين "قصة" و "مناظر" و لانه غالبا معندوش قصة فبيعتمد على المناظر و هي غالبا مناظر خليعة..
كلموني عن رسالة الفن في اى حاجة تاني الا فيما يخص عادل امام
انت لما بتنتج افلام تكلف ملايين الجنيهات في بلد نص سكانها فقراء انت كدة مش بتساعدهم و لا بتقدم لا رسالة و لا ترفيه انت كده بتسخر منهم...الفقير المعدم اللي افتقد لفرصة التعليم الجيدة فمقاييسه للجودة فقيرة مثله ايضا و اللي يقدم له الاعمال تبع المقاييس دي افقر منه لو كان يعمل بمنطق الجمهور عايز كده لانه معندوش ابداع و لا فكر للارتقاء بهم فبيقدم لهم اللي عايزينه من منطلق تجاري بحت

الأربعاء، 18 أبريل 2012

صورة بتستفزني



شاب وفتاه على شواطيء سيدي بشر اوائل ستينات القرن الماضي

من العجائب المحيطة بنشر صور قديمة ان الكل على اختلاف افكارهم بيتحسروا على الماضي فالمتحرر ينظر لصورة مثل هذه و يقول هكذا كان النساء احرار..اما المتدين المتزمت فيأتي بصورة لامرأة مبرقعة و يقول هكذا كان نساء الماضي محتشمات و يستدل بتلك الصورة على وجوب النقاب و انه قديم قد التراث

انا سأتحدث فقط عن هذه الصورة اعلاه..لانها اكثر استفزازا..


اللي في الصورة دول مش مصريين او مصريين من اصل اجنبي يوناني او ايطالي..!
الاسكندرية معروف انها كانت مركز رئيسي للجاليات الاجنبية في مصر اللي كانت دائما في مستوى معيشي اعلى من المصريين و متحررين اكثر من المصريين ..
الوضع في القرن الماضي كان ان المصايف يرتادها العائلات الثرية و فوق المتوسطة و اللي اغلبهم اجنبي او من اصل اجنبي او متأثر به و المتأثرين هؤلاء قلة لكن في المجمل مش حتلاقي حد له جد كان باشا الا و تلاقي في عيلته عرق تركي او اوربي
اما المصري الاصيل فكان مطحون في الغيطان اى الاراضي الزراعية التي يملكها الاقطاعيين...المصرية الاصيلة كانت مطحونة معاه و ملابسها تغطيها من اعلى رأسها لاخمص قدميها و كم ظلت قرون طويلة محرومة من التعليم
اللي عملته ثورة يوليو انه قضت فجأة على الهوة الطبقية دي و سمحت للمصريين بتملك الاراضي الزراعية و فجأة بقى طبقة من المصريين - ملهاش في البرستيج - بقت بتروح الشواطئ و بيدخلوا المية بهدومهم لانهم محافظين و مش بتوع مايوهات و فيه زي كدا بعض الممارسات اللي بيعملوها بعفوية جرحت برستيج الطبقة الكلاس زي مثلا الست الريفية اللي راحت المصيف و معاها صينية المحشي و الا الصعيدي اللي راح المصيف و طلع يتمشي في الشارع بالشورت و الا بالبرمودا!! ده بيخلي الاسكندرانية مضايقين و بيتحسروا على ايام زمان اللي في الصورة


الاثنين، 16 أبريل 2012

The Muslim theory of evolution


لماذا على هذا التغيير ان يشمل الزي؟
تذكرت نفسي لما كانت عندي فورة تدين اول حاجة عملتها اني ارتديت الخمار مع ان ملابسي العادية موافقة للزي الشرعي ( لا يشف و لا يصف و خلافه)....لكن التغيير في المظهر دائما سهل ويشعر الانسان انه فيه تقدم و انجاز ملموس